«Колледжде тиімді оқу және оқыту» техникалық және кәсіптік, орта білімнен кейінгі білім беру ұйымдары педагогтерінің біліктілігін арттыру курсы
Бағдарламаның мақсаты: білім берудегі заманауи тенденциялар негізінде тиімді және рефлексиялық оқыту тәжірибесін ұйымдастыруда колледж педагогтерінің кәсіби құзыреттілігін арттыру.
Бағдарламаның міндеттері:
- құндылықтарға негізделген тәсілдеме, инклюзивті білім беру принциптерін және білім алушылардың оқу мәдениеті мен мотивациясын дамыту туралы білімі мен түсінігін қалыптастыру;
- педагогтің рефлексиялық тәжірибесін және көшбасшылығын дамыту үшін «Іс-әрекеттегі зерттеу» (Action Research) мен «Сабақты зерттеу» (Lesson Study) тәсілдемелерін жоспарлау, енгізу дағдысын қалыптастыру;
- білім сапасын арттыру мақсатында заманауи тәсілдемелер мен қуатты педагогикалық құралдарды пайдалану арқылы тиімді оқу мен оқытуды ұйымдастыру дағдыларын жетілдіру;
- пәннің оқу мақсаты мен оқу нәтижелеріне сәйкес тізбектелген сабақтар топтамасын жоспарлап, іске асыру және өзінің педагогикалық тәжірибесіне рефлексия жасау бойынша педагогтің практикалық дағдыларын дамыту.
Күтілетін нәтижелер
Тыңдаушылар:
- оқу-тәрбие процесінде құндылықтарға негізделген тәсілдеме мен инклюзивті білім беру принциптерін және білім алушылардың оқу мәдениеті мен мотивациясын дамыту стратегияларын іске асырады;
- зерттеу әрекеті мен рефлексиялық тәжірибесін жетілдіру үшін «Іс-әрекеттегі зерттеу» мен «Сабақты зерттеу» тәсілдемелерін, әріптестермен бірлескен жұмыс жасау әдістерін жүзе асырады;
- оқудағы кедергілерді анықтау және мотивациялық оқыту теориясы негізінде білім алушылардың жас және жеке ерекшеліктеріне сәйкес қолдау көрсету әдістерін айқындайды; белсенді оқыту әдістерін қолдану арқылы диалогтік оқытуды, оқу үшін бағалау және оқуды бағалауды жүзеге асырады, оқу мен оқытуда ақпараттық-коммуникациялық және цифрлық технологияларды қолданады, білім сапасын арттыру мақсатында білім алушылардың сыни және креативті ойлауын дамытады, білім алушыларды оқу-тәрбие процесіне тарта отырып тиімді оқытуды жоспарлайды және ұйымдастырады;
- оқу мен оқытудың тиімді тәсілдерін қолданып, оқу мақсаты мен оқу нәтижелеріне сәйкес тізбектелген сабақтар топтамасын жоспарлайды және өзінің оқыту тәжірибесіне рефлексия жасайды.